Irlandiýa Hökümetiniň Halkara Talyp Haklary 2026
Irlandiýa Hökümetiniň Halkara Talyp Haklary (GOI-IES) maksatnamasy Irlandiýada Milli derejeler ulgamynyň (NFQ) 9-njy ýa-da 10-njy derejeleri boýunça (magistratura, diplomdan soňky hünär bilimi ýa-da doktorantura (PhD)) bilim almak isleýän ýokary derejeli halkara talyplary goldamaga gönükdirilendir. Maksatnama Irlandiýanyň hökümeti tarapyndan Irlandiýanyň ýokary okuw mekdepleri (ÝOM) bilen hyzmatdaşlykda maliýeleşdirilýär we Ýokary bilim geňeşi (HEA) tarapyndan dolandyrylýar. Bu başlangyç boýunça, NFQ-nyň 9-njy ýa-da 10-njy derejelerinde bir ýyllyk doly okuw üçin her ýyl 60 sany talyp haky berilýär.
Talyp hakynyň öz içine alýan çykdajylary:
Irlandiýa Hökümetiniň halkara bilim talyp haky, NFQ-nyň 9-njy ýa-da 10-njy derejelerinde bir ýyllyk doly okuw üçin 10 000 ýewro möçberindäki talyp hakyndan ybaratdyr. Kabul edýän ýokary okuw mekdepleri talyp hakynyň eýelerine degişli okuw ýyly üçin okuw tölegini doly ýatyrmaga (mugt okatmaga) borçludyrlar.
Saýlaw şertleri:
Maksatnama gatnaşmak üçin dalaşgärleriň hemişelik ýaşaýan ýeri ÝB/ÝYZ (EU/EEA), Şweýsariýa we Beýik Britaniýadan daşarda bolmalydyr. Dalaşgärler ilki bilen maksatnama gatnaşýan Irlandiýanyň ýokary okuw mekdepleriniň birine, şol okuw mekdebiniň kabul ediş tertibine laýyklykda, magistratura, diplomdan soňky bilim ýa-da doktorantura (PhD) maksatnamasy boýunça okuwa girmelidirler. Dalaşgärlere saýlap alan ugrunyň GOI-IES talaplaryna laýyk gelýändigini anyklamak üçin gönüden-göni degişli ýokary okuw mekdebine ýüz tutmak maslahat berilýär.
GOI-IES talyp hakyna arza tabşyrylýan wagtynda, dalaşgäriň Irlandiýanyň degişli ýokary okuw mekdebine kabul edilendigi barada şertli ýa-da gutarnykly teklibi (offer) bolmalydyr. Okuwa kabul edilendigi baradaky subutnama GOI-IES onlaýn anketasynyň degişli bölümine ýüklenmelidir. Öň GOI-IES talyp hakyny alan dalaşgärleriň gaýtadan arza tabşyrmaga hukugy ýokdur.
Arza tabşyrmagyň tertibi:
Dalaşgärler saýlaw şertlerine laýyk gelýändiklerini anyklamak üçin maksatnamanyň resminamalaryny ünsli okamaly. Arzalar 2026-njy ýylyň GOI-IES onlaýn portaly arkaly tabşyrylmalydyr. 2026-njy ýylyň tapgyrynda bir dalaşgär diňe bir arza tabşyryp biler.
Ähli arzalar üçin dalaşgär tarapyndan onlaýn portal arkaly ýüklenmeli iki sany hödürleýiş haty (recommendation letter) talap edilýär. Soňky günde serwerde ýüze çykyp biljek tehniki bökdençlikleriň öňüni almak üçin, arzalary bellenen möhletden öňüräk tabşyrmak maslahat berilýär. Möhlet gutarandan soň tabşyrylan arzalar kabul edilmeýär. Arza tabşyrylandan soň, oňa hiç hili üýtgeşme girizmek mümkin däl.
Arza tabşyrmak üçin soňky möhleti: 12-nji mart, 2026
2026-njy ýylyň netijeleri: 2026-njy ýylyň iýun aýynyň başy
Goşmaça maglumat: https://hea.ie/policy/internationalisation/goi-ies/